ཡུམ། Tibetan Women's Reality

Home » སྒྱུ་རྩལ་རྩོམ་རིག » ༼ ཆེ་ཆུང་བཤད་པ། ༽

༼ ཆེ་ཆུང་བཤད་པ། ༽

བྱམས་མེ་མགོན་བསོད།

ཀྱེ་ཀྱེ་ཕྱོགས་སུ་མ་ལྷུང་རིག་པའི་དབྱིག།

དོན་དུ་གཉེར་བ་རྣམས་ལ་མཁོ་མིན་ཡང་།།

གཡོ་དང་བཅོས་མའི་སང་རས་མཐུག་པོ་ཡིས།།

སྒྲིབ་དག་བག་ཡོད་བསྟེན་ཕྱིར་གཏམ་འདི་ཤོར།།

སྔོན་མེད་ལེགས་བཤད་སྐྱེས་ཀྱིས་ཆེས་ཕོངས་ཀྱང་།།

བར་མ་དོ་རུ་ལྷག་པའི་གནད་ཅིག་གིས།།

རེས་འགའི་རིག་པ་འགག་པའི་རྐྱེན་བྱེད་ན།།

རང་མཉམ་གོ་ལོག་འཛིན་རྣམས་བག་ཙམ་ཉོན།།

རྣམ་པར་གཡེང་བྱེད་གློག་སྦྱོར་ཆེས་དར་བས།།

རྣམ་རྟོག་གར་དགུའི་ཉམས་ཀྱིས་ཡིད་མྱོས་ཤིང་།།

རྣམ་འབྱེད་རིག་པའི་མཐུ་རྩལ་རགས་ཤིང་འགྲིབ།།

རྣམ་མང་སྐྱེ་བོ་ལོག་པར་འཕྱན་འདི་ཕངས།།

དེ་ཡང་གཟུགས་བོངས་གསུས་ཆེན་འགྱིང་ཚུགས་ཅན།།

འཁོར་བསྒྱུར་བཞིན་བཀུར་རིག་པས་རྣམ་དཔྱད་ཅིང་།།

ལེགས་བཤད་དོན་ལ་རྟོན་པའི་སྐབས་ཕྲ་བས།།

མཁས་བླུན་སེང་ཁྱིའི་གྲལ་མགོ་ལྡོག་པ་མང་།།

དབུལ་བོའི་ཡུལ་དུ་རྒྱགས་པ་རྣམས།།

ངོ་སོར་འཛིན་པའི་སྲོལ་ངན་དར།།

དེ་རྗེས་སྙེག་པའི་གཟུ་ལུམ་འགས།།

སྐམ་རིད་མཁས་ཀྱང་མིར་མི་བརྩི།།

གཟུགས་བོངས་ལ་ལྟོས་ཆེ་ཆུང་འཇལ་བྱེད་པ།།

བླུན་པོ་རང་ཤེད་ཅན་གྱི་མཐོང་སྣང་ཉིད།།

རྣམ་དཔྱོད་བློ་རིག་དཔལ་གྱིས་དབུལ་གྱུར་ན།།

གྱད་ཆེན་རོ་གཟུགས་ཆེ་བས་ཅི་བྱར་ཡོད།།

སེང་གེ་གཟུགས་ཆེན་སྟོབས་ཀྱི་བདག་པོ་ཡང་།།

རི་བོང་བློ་ཡིས་བཏུལ་སོགས་གཏམ་བརྒྱུད་མང་།།

ཤ་ཡི་གདུ་བུ་ཅན་གྱི་རྒྱགས་པའི་ཁྲོད།།

རིག་པ་གཉེར་བའི་དཀའ་ཐུབ་བསྟེན་མཁན་ཉུང་།།

ཀེང་རུས་གཟུགས་འཆང་མི་ལ་རྗེ།།

ཆེ་སྙན་གངས་རིའི་ཁོངས་ལས་བརྒལ།།

གཟུགས་བོངས་ཆེ་བས་ཆེར་རློམ་ན།།

གླང་ཆེན་བཀུར་བར་འོས་སམ་ལྟོས།།

གནམ་འོག་དབང་དུ་བསྡུ་བ་ལ།།

རྣམ་རིག་བཀྲ་བའི་ཏུན་ཞའོ་ཕེན།།

མིའུ་ཐུང་གཟུགས་ཀྱིས་མ་མནར་བར།།

དུང་ཕྱུར་བཅུ་ཡི་རྗེ་བོར་གྱུར།།

གཟུགས་བོངས་ཆེ་བས་ཆེ་སྙམ་པ།།

གཟུ་ལུམ་འགའ་ཡི་མཐོང་སྣང་ལས།།

ཐང་ལས་བོངས་ཀྱིས་འཕུང་བའི་གཏམ།།

ལོ་རྒྱུས་བྱུང་རབས་གང་དུ་མེད།།

འཇོན་པའི་མི་དེ་མཐེ་བོང་ཙམ།།

མགྱོགས་པའི་རྟ་དེ་རི་བོང་ཙམ།།

ཞེས་པའི་གཏམ་དཔེས་གཟུགས་ཆེ་བས།།

འཇོན་པའི་ངེས་པ་མེད་པར་སྟོན།།

རྒྱ་དང་ཁ་ཆེའི་ཟ་ཁང་འགར།།

ལྐོག་ཚོང་བོངས་ཆེན་བྲིན་པར་ཐོས།།

གཞན་དུ་རྒྱལ་སྲས་ཞི་བ་ལྷས།།

གཅན་གཟན་ཟས་སུ་སྲུང་རིགས་གསུངས།།

ཆེ་ན་ཆེ་རོ་ཁོག་སྟོང་དེ།།

སྡོང་རྒན་ཆེ་བ་ཁོག་རུལ་དང་།།

རྣམ་དཔྱོད་རིག་པའི་རྩལ་སྐྱེད་པར།།

མི་གཙང་རྐྱལ་བ་ཆེ་དགོས་མེད།།

ཟས་སུ་བསྟེན་ལ་དུད་འགྲོ་སོགས།།

གཟུགས་བོངས་ཆེ་ཆུང་ལ་ལྟོས་མོད།།

བདེན་ལུགས་ཆེ་བར་འཛིན་པ་ལ།།

གཟུགས་དང་ལང་ཚོས་རྔོ་མི་ཐོགས།།

ཉི་མ་འབུམ་ལས་ཟིལ་ཆེ་བ།།

རིག་པའི་འདབ་སྟོང་བཞད་པ་ཉིད།།

གཟུགས་ཆེས་དྲེགས་འཆང་སྐྱེ་བོ་རྣམས།།

ལྦ་བ་རྒྱན་དུ་ངོམ་དང་མཚུངས།།

ལེགས་བཤད་གཏམ་གྱི་མཛོད་འཛིན་པ།།

ས་པན་དམ་པའི་ཞལ་ལུང་ལས།།

དེ་ཉིད་སྨྲ་རྣམས་ཆེར་བཀུར་བར།།

གདམས་པའི་མན་ངག་སྙིང་ལ་ཆོངས།།

དེང་འདིར་གློག་འཕྲུལ་འབྱོར་བ་ཡིས།།

ཕྱུག་ཀྱང་སེམས་ཀྱི་འཚོ་བ་ཡིས།།

ཀུན་ནས་ཕོངས་ཕྱིར་དོན་དམ་གྱི།།

ཆེ་བ་བློ་གྲོས་དཔལ་ལ་ལྟོས།།

ཕག་སོགས་དུད་འགྲོ་ཤ་ཤེད་བོངས།།

རྒྱགས་ཤིང་ཆེ་བ་སྲོག་གི་གཤེད།།

སྐྱེ་བོ་རྒྱགས་ཆེན་གཉིད་ལྕི་ཞིང་།།

སྒྱུད་ལུག་ཆེ་ཞིང་སློབ་གཉེར་གཤེད།།

དེང་སང་བླ་དཔོན་ཕལ་མོ་ཆེ།།

གཡེང་དགའ་དཀོར་སྣུམ་སྤྱོད་ཆེས་བས།།

རྒྱགས་ཤིང་ཤ་མདངས་བཀྲག་མཐོང་ཚེ།།

རྨོངས་དད་ཅན་དག་ངོ་སོར་འཛིན།།

གནའ་དེང་དམ་པས་རྣམ་པར་ལེགས་དཔྱད་པའི།།

བྱམས་དང་བརྩེ་སོགས་ཞི་བདེའི་རྩ་ལག་ལ།།

སྨན་པའི་སྲོལ་བཟང་སྐྱེས་སུ་བཞག་པའི་ནོར།།

འཇིག་ཉེན་ཆེ་ཞེས་མཁས་རྣམས་གཅོང་སྐད་ཤོར།།

དེས་ན་གཟིར་གནས་ཤེས་རབ་སྟོབས་ལྡན་རྣམས།།

ཉམ་ཆུང་བྱད་གཟུགས་ཅི་ལྟར་ཉེས་ན་ཡང་།།

ཀླུ་རྒྱལ་གཙུག་ནོར་བཞིན་དུ་བཀུར་འོས་ལས།།

ལོག་རྟོག་འདིས་ཀྱང་མུན་པར་ལྟུང་ཉེན་ཆེའོ།། 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Kunsang Dolma’s memoir

click to buy

Enter your email address to follow this blog and receive notifications of new posts by email.

Join 67 other followers

%d bloggers like this: